बुढानीलकण्ठ नगरपालिकाका उपप्रमुख अनिता लामाले नगरपालिकाले यो आर्थिक वर्षदेखि सांकेतिक भाषाका दोभाषे राख्न लागेको जानकारी दिनुभएको छ । CBM Global Nepal को साझेदारीमा नेपाल अपाङ्ग महिला संघले असारको १६ देखि १८ गतेसम्म आयोजना गरेको ३ दिने क्षमता अभिबृद्धि तालिमको उदघाटन सत्रमा बोल्दै उहाँले नगरपालिकाको न्यायिक समिति अन्तर्गत रहने गरी दोभाषे राख्न लागेको बताउनुभएको हो । पालिकाले यो आर्थिक वर्षदेखि सवै वडामा अपाङ्गता भएका व्यक्तिका लागि बजेट छुट्टयाउन लगाइएको जानकारी दिनुभयो ।
साथै यसअघि पालिकाका नीति कार्यक्रम र बजेट संस्थागत नभएपनि यसपालिदेखि बजेट तथा नीति कार्यक्रम संस्थागतरुपमा ल्याएको दावी उहाँले गर्नुभयो । अपाङ्गता भएका व्यक्तिहरुको सहभागितामा नीति र कार्यक्रममा नहुँदा अपाङ्गताका क्षेत्रमा काम भएपनि परिणाम देखाउन नसकिएको उहाँको भनाइ थियो । अपाङ्गतालगायत अन्य सिमान्तकृत समुदायलाई दया देखाउने हैन की उनीहरु बराबरी हिस्सेदार बनाएर सामाजिक समावेशीकरणको मान्यतामा अघि बढ्न सवैलाई आग्रह गर्नुभयो ।
यसैगरी तालिमको समापन सत्रमा बोल्दै तारकेश्वर नगरपालिकाकी उपप्रमुख सिर्जना बुर्लाकोटीले अपाङ्गता भएका व्यक्तिका लागि सुरुदेखि काम गर्न चाहेको र सकेजति गरेको भन्दै अपाङ्गताको हरेक क्षेत्रमा काम गर्न र यसका लागि सहजीकरण गर्न आफु तयार रहेको बताउनुभयो ।
यौन तथा लैंगिक हिंसा प्रतिकार्य, सहयोगी सहितको निर्णय पद्दति तथा न्यून प्रतिनिधित्व भएका समुहको समावेशीता सम्बन्धी ३-दिने क्षमता अभिवृद्धि सम्बन्धी तालिममा न्यून प्रतिनिधित्व अपाङ्गता समूहको पहिचान र अधिकार, अपाङ्गता समावेशीकरण, लैंगिक हिंसाको अवधारणा, प्रकार र अपाङ्गताको अवधारणा र हिंसाविरुद्ध प्रतिकार्य, अपाङ्गता भएका महिला तथा बालिकाहरु र यौन तथा लैंगिक हिंसामा केन्द्रित UNCRPD का प्रावधानहरु, न्यायमा पहुँच, घटना व्यवस्थापन, अपाङ्गता भएका महिलाको नेतृत्व विकास, न्यून प्रतिनिधित्व व्यक्तिहरु: सामाजिक न्याय र सामुदायिक सहायतालगायतका विषयमा विभिन्न विज्ञहरुले सत्र सञ्चालन गरेका थिए ।
तालिममा अन्तरक्रिया समूहकार्य, प्रस्तुती,लगायतका विधि अपनाइएको थियो । तालिममा सहभागीहरुले लैंगिक हिंसा र समावेशीकरण न्यून प्रतिनिधित्व भएका समुदाय र उनीहरुको स्वनिर्णयको अधिकारलगायतका बिषयमा जानकारी प्राप्त गरेका थिए । तालिममा नेपाल अपाङ्ग महिला संघको कार्यसमितिका सदस्य, कर्मचारीहरु र अपाङ्गताको क्षेत्रमा काम गर्ने संघसंस्थाका प्रतिनिधि गरी ३२ जना महिलाको सहभागिता थियो ।