नेपाल अपाङ्ग महिला संघले तारकेश्वर नगरपालिकामा औपचारिक रुपमा लैंगिक हिंसाविरुद्धको परियोजना कार्यान्वयन सुरु गरेको छ ।

यसका लागि संघले  साउन ७ २०८१ मा तारकेश्वर नगरपालिकाका प्रमुखको आतिथ्यतामा परियोजना कार्यान्वयनको जानकारी दिन तारकेश्वर नगरपालिकाको कार्यालयमा एक कार्यक्रमको आयोजना गर्‍यो । उक्त कार्यक्रममा नगरप्रमुख कृष्णहरि महर्जनले लक्षित वर्ग र सिमान्तकृत समुदायको जीवन परिवर्तन गर्न यस परियोजना सफल बन्न सक्ने बताउनुभयो ।  उहाँले नगरपालिकाका सम्वन्धित शाखासँग समन्वय गरेर काम गर्न अनुरोध गर्दै नगरपालिकाको पूर्ण साथ र सहयोग रहने बताउनुभयो ।

उपप्रमुख सिर्जना बुर्लाकोटीले नगरपालिकाले अपाङ्गता भएका व्यक्तिलाई घर घर मै गएर परिचयपत्र वितरण गर्ने गरेको जानकारी दिँदै यसक्रममा अति गम्भीर प्रकारको अपाङ्गता भएपनि नीलो रङको परिचयपत्र पाएका अपाङ्गता भएका व्यक्तिलाई उनीहरुले पाउँदै आएको सेवा सुविधामा थपेर दिने गरेको बताउनुभयो । उहाँले यो परियोजनाले अपाङ्गता भएका हिंसा प्रभावित महिलाको न्यायमा पहुँच पुग्न सघाउने भन्दै कार्यक्रम सफल बनाउन पुरै सहयोग रहने प्रतिवद्धता जनाउनुभयो ।

कार्यक्रममा नगरपालिकाका प्रशासकीय अधिकृत, पालिकाका सवै शाखा प्रमुखहरु, अपाङ्गता समन्वय समितिका सदस्य, नगरपालिकाभित्रका अपाङ्गता भएका व्यक्तिहरु, नेपाल अपाङ्ग महिला संघका पदाधिकारी र कर्मचारी गरी ४६ जनाको सहभागिता थियो ।

कार्यक्रममा परियोजना संयोजक आयुष्का श्रेष्ठले तारकेश्वर नगरपालिकामा गरिने गतिविधि र कार्यक्रमका बारेमा जानकारी दिनुभयो । यसैगरि अध्यक्ष टीका दाहालले परियोजनाको उद्देश्यका बारेमा प्रकाश पार्नुभयो ।

संघले  सीविएम ग्लोवलसँगको सहकार्यमा हिंसा प्रभावित अपाङ्गता भएका महिलाको लैंगिक हिंसाविरुद्ध न्यायमा पहुँच पुर्‍याउनका लागि काम गर्न आगामी ४ वर्षका लागि तारकेश्वर र  बुढानीलकण्ठ नगरपालिकालाई लक्षित गरी परियोजना सुरु गरेको हो ।